recent
أخبار ساخنة

إزاي أدخل هندسة من 70% ؟

معادلة كلية الهندسة


كل ما تود معرفته عن " معادلة كلية الهندسة " و كيفية التقديم ؟ و كيفية دخول كلية الهندسة بكل سهولة من دبلوم فني صناعي أو معهد فني صناعي ! و تحميل كل الكتب و المذكرات لمنهج المعادلة ! و تحميل شرح فيديوهات ومحاضرات تخص منهج المعادلة ! كيفية التأهيل للمعادلة و نصائح و إرشادات مفيدة تهمك سوف تجدها في هذا المقال البسيط .
.
.
.
.
سنتطرق صديقي الباشمهندس إلي موضوع من المواضيع المهمة ألا وهو كيفية دخول كلية هندسة من دبلوم فني صناعي او معهد فني صناعي بمجموع 70% فقط ، نعم يا صديقي هذه منحة يجب عليك إقتناصها و الإستفادة منها مقدمه من قبل المجلس الأعلي للجامعات ، سنقسم هذا المقال إلي عدة عناوين رئيسية وهي :-
.
.
.
  • التعريف بمعادلة كلية الهندسة ؟

  • كيفية دخول هندسة بالدبلوم او المعهد الفني ؟

  • كيفية التقديم علي معادلة كلية الهندسة أونلاين ؟

  • ما هي المواد المقررة " منهج المعادلة " ؟ 

  • تحميل الكتب و الشروحات الخاصة بالمعادلة ؟

  • ما هي مواعيد الإمتحانات ؟


لا تقلق يا صديقي سوف أقوم بشرح مفصل لكل جزئية تخص المعادلة كل ما عليك هو قراءة المقالة جيداً من أولها حتي آخرها لكي تستفيد من الموضوع .. سوف أتحدث باللهجة العامة المصرية في باقي المقال ربنا يوفقنا جميعاً لكل خير ..

.
.
.
.
بسم الله الرحمن الرحيم : هيا بنا نبدأ علي بركة الله :)

أنت تعرف إنك لو أنت في دبلوم صنايع او معهد فني صناعي تقدر بكل سهولة  تدخل كلية الهندسة ( حكومي أو خاص ) ؟
.

انتا بتقول ايه يا عم ؟ يعني أنا كطالب دبلوم عادي او معهد فني سنتين أو حتي مخلص : ينفع ادخل كلية الهندسة ، أجيب كام مجموع عشان أدخل كلية الهندسة ؟ زي طالب الثانوية العامة لما يجيب 99% !!!
.
.
.
إسمحلي أقولك أيوة ينفع تدخل كلية الهندسة حكومي أو تدخل كلية هندسة خاص زي ما أنت عايز و زي ما تحب يا برنس …….

- طب إزاي يا عم فهمني -


.
.
حاضر أصبر عليا و أقرأ الموضوع دا كويس وأنت في الآخر هتعرف و تفهم كل حاجة إنت عايزها ، علشان انا النهارده جاي أقولك علي كل حاجة بالتفصيل الممل و هشرحلك كل اللي انت عايزة و كمان أي سؤال هيجي في دماغك أنا هجاوبك عليه بإذن الله ، فمتستعجلش ، وقوم هات فنجان القهوة وتعالي أفهمك الزتونة …. يلا بينا ===>>>
.
.
.
.
.

التعريف بمعادلة كلية الهندسة ؟😃👍

بسم الله ، صلي علي النبي كداا ، بص يا سيدي معادلة كلية الهندسة دي زي مسابقة و منحة كدا من الدولة عاملها  المجلس الأعلي للجامعات في مصر ، إسمها الرسمي هو " المسابقة المركزية و المسابقة الموحدة " بين قوسين كدا ( معادلة كلية الهندسة ) طيب وبعدين ، المعادلة دي يا باشا عبارة عن مجموعة إمتحانات زي إمتحانات الثانوية العامة ( علمي رياضة ) بالظبط و نفس المواد حرفياً ما عدا ( اللغة العربية + اللغة الثانية "فرنسي او ألماني ") دول مش معانا في المعادلة و مش هتمتحنهم …
.
.
.

إزاي أدخل كلية الهندسة من 70% دبلوم صنايع





كيفية دخول هندسة بالدبلوم او المعهد الفني ؟


تقدر بكل سهولة تدخل كلية الهندسة من دبلوم فني صناعي أي قسم لا يشترط قسم معين أياً كان قسمك لو أنت جايب 70% او أكتر في الدبلوم يبقي انت كدا قدامك فرصة ذهبية وهي دخول كلية الهندسة حكومي بكل بساطة عن طريق المعادلة دي وهتقدم علي المسابقة " الموحدة " .

طيب لو أنا مخلص معهد فني صناعي برضو ، نفس النظام لو انت معهد فني صناعي أي قسم لا يشترط قسم معين وجايب 70% او أكثر يبقي انت كدا مؤهل جدا لدخول كلية الهندسة حكومي من خلال فرصة التقديم علي معادلة كلية الهندسة و هتقدم علي " المسابقة المركزية " .



ما هي المواد المقررة " منهج المعادلة " ؟ 
😃👍



طيب أنا همتحن في كام مادة ؟ و ايه هي المواد علي همتحنها في المعادلة ؟ أنت هتمتحن في المواد دي ( الانجليزي + الرياضة 1 + الرياضة 2 + الفيزياء + الكيمياء ) تمام كدا ، تمام طيب وبعد كدا ، بعد كدا يا برنس هتمتحن ولو ربنا وفقك في الامتحانات و نجحت بس يعني لو جبت ( 50%) بس في كل المواد اللي امتحنت فيها هيتم قبولك في كلية الهندسة علي طول بشكل طبيعي و زيك زي بتوع ثانوية عامة بالظبط …




ما هي مواعيد الإمتحانات ؟😃👍


طيب المعادلة دي بتبقي إمتي يعني في شهر كام أو ايه المواعيد بتاعتها .. أقولك يا صديقي المعادلة دي بتكون كل سنة في شهر 9 و الامتحان بيكون في شهر 10 .. يعني التقديم علي معادلة كلية الهندسة بيكون من شهر 8 لحد آخر شهر 9 ، و موعد الإمتحانات بيكون في أول شهر 10 . و طبعا المواعيد بتختلف كل سنة ، بس متشغلش بالك ، المواعيد و جدول الإمتحانات بينزل علي موقع المجلس الأعلي للجامعات كل سنة ، تقدر تشوفه و تعرف إمتحاناتك امتي بالظبط و تستعد ليها و تروح تمتحن في المعاد المحدد ..


اوبا دا فيها تقديم و جداول و مواعيد ، لا دا شكله الموضوع كبير و حوار !!!!

لا متقلقش أنا قولتلك هفهمك كل حاجة بس الصبر مفتاح كمبيوتر :)

.
.
.
.

.

كيفية التقديم علي معادلة كلية الهندسة أونلاين ؟😃👍


تمام بص يا باشتنا بالنسبة للتقديم سهل جدا و بسيط و مش هيكلفك لا جهد و لا فلوس و لا تعب أصلا ، قولي ليه ؟ جدع عشان سألتني ليه ، حلو عشان سألتني ليه ، أقول ليه ؟؟؟ علشان التقديم إلكتروني ، إنت هتقدم علي المعادلة بكل سهولة أنت وقاعد مكانك في بيتك علي سريرك ، من خلال موقع المجلس الأعلي للجامعات برضو هيحتاج منك شوية أوراق كدا هترفعهم علي الموقع و تدفع الرسوم و إشطا كدا انت قدمت و الف مبروك يا بش مهندس ..


أستني بس موقع ايه و ورق ايه و رسوم ليه ؟ بص يا برنس الورق المطلوب كالآتي :

  • شهادة المؤهل ( شهادة الدبلوم أو شهادة المعهد )
  • البطاقة الشخصية
  • صورة شخصية
  • وصل الدفع ( اللي دفعت بيه الرسوم )



إزاي أدخل كلية الهندسة من 70% دبلوم صنايع




دول الأوراق المطلوبة للتقديم في معادلة كلية الهندسة بس ، طيب هدفع فين و هدفع إزاي ؟

فيه طريقتين لدفع الرسوم :

  1. أول طريقة إلكترونية : من خلال أي مكنة فوري عند أي سوبر ماركت و تاخد إيصال الدفع عشان هترفعه مع الورق زي ما أتفقنا فوق …
  2. تاني طريقة يدوية : من خلال الكلية اللي هتمتحن فيها ، هتروح تقولهم أنا عايز اقدم علي المعادلة و عايز ادفع الرسوم ، هتروح تورد في الخزينة الرسوم و تاخد وصل بيهم و تحتفظ بيه برضو عشان هترفه علي الموقع علي النت ..




طيب تمام كدا فيه سؤال هنا ما هو المبلغ اللي هيتدفع كرسوم تقديم دا ، هتدفع كام رسوم تقديم علي معادلة كلية الهندسة ، أقولك انا ، هو بيكون في حدود 500 ج مصري أكتر او اقل بحاجة بسيطة ، انت هتروح هناك و تسأل و هم هيقولولك كام بالظبط .. المهم تحتفظ بالوصل عشان ترفعه مع الورق علي موقع المجلس الاعلي للجامعات .. تمام




طيب كدا قدمنا و رفعنا الشهادة + البطاقة + صورة شخصية + الوصل علي النت و كله كدا تمام و فل اوي ، انت كدا ماشي صح لحد دلوقتي ، هتسيبهم 24 ساعه يراجعوا الورق بتاعك و لو ورقك مظبوط و وواضح و تمام هيتم قبولك في إمتحانات المعادلة و هيطلعلك رقم جلوس علي الموقع برضو ،، هتطبعه فوراً و تاخد ( رقم الجلوس + صورة شخصية + الوصل ) و تروح بيهم الجامعة عشان تختم رقم الجلوس من هناك .. وكدا نذاكر بقا ..




آه آه هي دي المشكلة الكبري هنذاكر منين ؟ وفين الكتب اللي هنذاكر منها ؟ و فين الشرح بتاع منهج المعادلة ؟ و مين هيفهمني الإمتحان و نظام الامتحانات و إزاي هحل الامتحانات ؟؟؟





يعم متقلقش قولتلك هظبط .. بص يا سيدي بالنسبة للكتب أنا جمعتلك كل الكتب و الملازم و المذكرات و المراجعات و الإمتحانات السابقة لسنين اللي فاتت محلوله و كل حاجة هنا Pdf أنت كل اللي عليك بس انك تحملها هتلاقيها آخر الموضوع تحت خالص ، وتتوكل علي الله تذاكر بقا :)




طيب بالنسبة للشرح و المحاضرات و الفيديوهات ( برضو جايبلك شرح لكل المواد اللي هتمتحن فيها تحت ) روح أدخل عليها و ذاكر و ربنا يوفقك ..




طيب مين هيفهمني وضع الامتحانات و إزاي اتعامل مع ورقت الاجابة و كدا .. ( برضو جايبلك فيديوهات تشوفها هتفهمك كل حاجة عن امتحانات المعادلة )




 

تحميل الكتب و الشروحات الخاصة بالمعادلة ؟ 😃👍



إزاي أدخل كلية الهندسة من 70% دبلوم صنايع

💭

💬

💬

💫


إزاي أدخل كلية الهندسة من 70% دبلوم صنايع



طيب كدا قدمنا علي المعادلة و معانا كل الكتب و المذكرات Pdf و معانا كمان الشرح لكل المواد و معانا إمتحانات سابقة و معانا ناس بتفهمنا نظام الامتحانات … طيب أنا مخنوق و مش عارف أذاكر و محبط و مكتئب ( برضو عامل حسابي  ، وجايبلك شوية فيديوهات من اللي قلبك يحبهم هيخلوك تاكل الكتب اكل و تبقي صاروخ أرض جو في المزاكرة و هيساعدوك علي الحفظ و الفهم و يخرجوك من جو الإكتئاب و الإحباط و اليأس اللي انتا فيهم دول و هغير تفكيرك و يساعدوك علي النجاح و التفوق و التميز .. ربنا يوفقك يا صديقي .. 💪💪


إزاي أدخل كلية الهندسة من 70% دبلوم صنايع



كدا كل حاجة تمام و أنت كدا عرفت كل حاجة عن المعادلة بالتفاصيل ، روووح ذاكر بقا يا أخي 😁 سلااااااااام

author-img
بدر جمال

تعليقات

google-playkhamsatmostaqltradent