(ما هي معادلة هندسة ) ؟
هي مسابقة بيعملها المجلس الأعلي للجامعات كل سنه عبارة عن مجموعة امتحانات
( من لهم الحق في التقديم في معادلة هندسة ) ؟مبدئيا لازم تبقي عارف ان خريجي التعليم الفني الصناعي فئتين من الطلبة ....
الفئة الأولي " طلاب المسابقة الموحدة " :هي خريجي مدارس الدبلوم الفني الصناعي نظام الثلاث سنوات يعني من الاخر خريجي مدارس الدبلوم الصنايع ال3 سنين او ما يعادلهم من شهادات زي المجمع كدا بتاع الانتاج الحربي او الاميرية وغيرهم ... دول شرط تقديمهم للمعادلة هو حصول الطالب علي 70% فأكثر من مجموع سنة ثالثة فقط .
الفئة الثانية " طلاب المسابقة المركزية " :هي خريجي مدارس الدبلوم الفني الصناعي نظام الخمس سنوات أو خريجي المعاهد الفنية الصناعية السنتين يعني الحاصلين علي معهد فوق متوسط ... دول شرط تقديمهم للمعادلة هو حصول الطالب علي 50% فأكثر من مجموع سنة التخرج فقط
(ماهي مواد اللي هتمتحن فيها ؟ وهل في اختلاف بين طلاب الدبلوم 3 سنين و طلاب ال5 سنين ؟)المواد هي مواد 3 ثانوي عام علمي رياضة وهي كالاتي :
1- الميكانيكا ( بفرعيها الاستاتيكا والديناميكا ).
2- التفاضل والتكامل " تسمي أحيانا برياضة 2 " .
3- الجبر والهندسة الفراغية " تسمي أحيانا برياضة 1 " .
4- الفيزياء .
5- الكيمياء .
6- اللغة الانجليزية ( مع التحفظ ان مافيش أسئلة قطعة أو مقالية )
اة للأمانة لازم تكون عارف ان امتحاناتك كلها لل6 مواد بتكون بنظام الاختيارات من 4 اختيارات وده مش مفتاح النجاح لازم تبقي عارف ان الامتحانات من النوع MCQ أو الاختيار من متعدد من أصعب انظمة الامتحانات لان الاختيارات مش بتكون محطوطة عشوائي لأ بتتحط بنائا علي توقعاتهم لغلطاتك فخالي بالك الناتج النهائي لأي مسأله أهم شيء في حياتك لان ممكن تتعب في السؤال وتختار ناتج ويطلع غلط فلازم تكون مركز ومتدرب كويس جدا .جميع الطلبة سواء خريجي 3 سنين أو 5 سنين أومعهد سنتين كلهم هيمتحنو في ال 6 مواد فكلكو زي بعض وهتمتحنو في نفس التوقيت ومع بعض وهتقدمو مع بعض عادي ..
( التقديم بيكون امتي)؟بيكون علي شهر 8 من كل سنة وبيكون الكتروني من خلال موقع المجلس الاعلي للجامعات .
( هل كل الطلبة من جميع أنحاء الجمهورية بيمتحنوا في هندسة القاهرة )؟قطعا لأ والتوزيع الجغرافي سواء للتقديم أو للامتحان بيكون بنائا علي عنوانك اللي في بطاقتك وهو كالاتي :
قطاع القاهرة الكبري الطلاب اللي هيقدموا وهايمتحنو في كلية الهندسة جامعة القاهرة بالجيزة هم اللي عنوان البطاقة علي (القاهرة - الجيزة - القليوبية - الفيوم -بنى سويف - حلوان).
قطاع قبلى الطلاب اللي هيقدموا وهايمتحنو في كلية الهندسة جامعة أسيوط هم اللي عنوان البطاقة علي (المنيا - سوهاج -أسيوط - قنا - أسوان - الوادى الجديد - الأقصر - البحر الاحمر) .
قطاع بحرى الطلاب اللي هيقدموا وهايمتحنو في كلية الهندسة جامعة كفر الشيخ هم اللي عنوان البطاقة علي (الإسكندرية - البحيرة - كفر الشيخ - مطروح- الغربية).
قطاع الدلتا و القناة الطلاب اللي هيقدموا وهايمتحنو في كلية الهندسة جامعة الزقازيق هم اللي عنوان البطاقة علي (الشرقية - الدقهلية - المنوفية - الإسماعيلية - السويس - دمياط - بورسعيد - شمال سيناء- جنوب سيناء).
( هل لو لاقدر الله مانجحتش ليا فرص تاني أقدم في امتحان المعادلة)؟
بالنسبة للفئة الأولي اللي قولنا عليهم طلبة الدبلوم 3 سنين ليهم فرصتين للتقديم لمرتين بشرط ان مرتين التقديم دول يكونو ورا بعض يعني يقدم خلال سنتين متتاليتين في خلال 3 سنين بدئا من سنة التخرج يعني بتبدء تعد 3 سنين بما فيهم سنة التخرج تقدر تقدم في أي سنتين فيهم بس لازم يكونو سنتين ورا بعض يعني لو انت خريج سنة 2012 تقدر تقدم خلال 2012 - 2013 - 2014 اختار اي سنتين ورا بعض قدم فيهم هما دول الفرصتين بتوعك بس كدا مافيش فرص تاني .بالنسبة للفئة الثانية اللي قولنا عليهم طلبة الدبلوم 5 سنين او معهد سنتين الحاصلين علي معهد فوق متوسط يعني ليهم 3 فرص للتقديم يتم احتسابهم بدئا من سنة التخرج فمثلا لو خريج 2012 يبقي ليك انك تقدم في المعادلة سنة 2012 - او 2013 او 2014 براحتك ليك انك تقدم في ال 3 محاولات كلهم عادي براحتك يعني ليك فرصة زيادة عن طالب الدبلوم ال3 سنين .( ايه أفضل مصدر أذاكر منو المواد)؟اليوتيوب ثم اليوتيوب ثم اليوتيوب وسيبك من أي دعاية مغرضة من أي سنتر وفر فلوسك ووقتك واتعب واعمل اللي عليك في طلبة كتير جدا بتشتري كتب الخارجية للثانوية العامة زي كتب المعاصر للرياضة - والامتحان أو المثالي في الفيزياء والكيمياء وبيذاكرو الشرح من اليوتيوب في ملايين شارحين المناهج دي علي اليوتيوب اتعب شويا بس ودور ...
نصيحة أخيرة من أخ كبيربلاش بلاش بلاش تعلق نجاحك علي حد سواء كان الحد ده شخص او سنتر انت هتدخل الامتحان مش هاتنجح غير بمجهودك فقط وتعبك لو كان موجه صح هايشفعلاك وهتحل الامتحان .....
معلش طولت عليكو هنزلكو رابط عليه جميع امتحانات المعادلة في بوست تاني علشان تدرب نفسك كويس جدا بالتوفيق للجميع .ِ