recent
أخبار ساخنة

لو مجموعك من 75 ل 85 فا البوست دا ليك




لو مجموعك من 75 ل 85 فا البوست دا ليك

بص يباشا اغلب المجاميع في الدبلومات عمتا بتبقي من 75 ل 90 فانت بقا هنا محتار ما بين خاص وحكومي ومابين مدة الدراسة والتكاليف والسفر لو المعهد دا او الكلية بعيد وكدا وما بين التخصص الي هتدرسه بتحبه ولا لا وهتتميز في ولا لا
ودي اغلب او اكتر الحاجات الي بسببها كتير من الطلاب مش بيكملوا تعليم اصلا بسببها فا خليني اوضحلك تدخل اي واحكيلك عنه نبذة


اولا نبدا من 75ل 80
بص هنا بقا انت بتلعب في المنطقة الخطيرة بمعني الكلمه لان هنا انت معندكش معاهد حكومي غير واحد بس وهو فني صناعي وممكن تكون الكليات الجديدة الي هيا كليات الصناعه والطاقة الي لسه الوزير قال عنها انهم السنادي في 6 كليات هيبقوا في التنسيق فا ممكن يكون تنسيقهم من 75ل80 والله اعلم


اولا لو انت ناوي ع حاجه حكومي من الاخر وهدفك هندسة وبتحب الدراسة والمذاكرة الكتيرة عليك وعلي فني صناعي

معهد فني صناعي
انت بتدرس فيه 4 تيرم اولي 2 وتانية 2
في سنة اولي مش مطلوب منك غير انك تنجح من غير ما تشيل مواد. طب افرض شيلت مادة او اتنين عادي يباشا هتدخل سنة تانية ومعاك المادتين دول تمتحنهم امتا بقا في شهر ابريل ونت في سنه تانية تمام. طب افرض شيلت 3 او، 4 لا هنا بقا هتعيد السنه بس هتعيد السنه في المواد الي شلتها بس تمام.
طلعت بقا سنة تانية صافي وكلوا تمام
انت بقا مطالب في سنة تانية لو عاوز تدخل هندسة انك تجيب امتياز وعلي فكرة الامتياز من 85% هندسة بقا بتاخد من فوق 95% فا معني كدا انك حتا لو جبت امتياز ممكن متدخلش هندسة
بس المشوار مش صعب لان ال 5% دول 90درجه ما بين بقا اعمال سنة وامتحنات ترم اول وتاني فا انت بايدك تبني نفسك وتعمل نفسك بنفسك الطريق صعب بس مش مستحيل في غيرك كتير عملوها وانت لو شايف نفسك هتقدر ادخل وربنا هيوفقك

ثانيا لو عاوز تدخل معهد خاص من 75/80
افضل حاجه بقا هنا معهد نظم ومعلومات
دا معهد خاص معتمد من الوزارة بتاخد منه شهادة بكاليريوس نظم ومعلومات
بيبقي زيك زي خريج كليه تجارة بس بتدرس انت سنة زيادة بعد المعهد دا عشان تتساوي بالظبط مع خريج كلية تجارة
مصاريفه حوالي من 8000ل 12000 علي حسب المعهد
والمعهد موجود في اماكن كتيرة يعني ممكن يكون في واحد في محافظتك ومتعرفش
نظام الدراسة فيه 4 سنين
وبيقبل جميع الاقسام.

ثانيا بقا من مجموع 80/85
هنا بقا المنطقة الدافئة
انت هنا يزميلي في منطقة مليانه حكومي علي خاص حاجات كتييييير ونت يعيني غلبان حيران تايه ومش فاهم حاجه
تعالي ابسطلك الدنيا

اولا لو عاوز حاجه حكومي
هنا برضو معهد فني صناعي او معهد صرف ومساحه او معهد الصحافه كلهم بيأهلوا لكلية هندسة بس كل معهد دراسته مختلفه عن التاني في بعض المواد
ومعاك برضوا هنا بقا والي هتبقي اكيد موجودة وهي كليات الصناعة والطاقة
ودي يمعلم عبارة عن برامج فنية جديدة مطلوبة في سوق العمل الدولة وفرتها لنا عشان نلبي احتياجاتنا ونصنع احنا بدل ما نستورد
حد هيقولي الكلية دي هشتغل بعد ما اتخرج هقوله
لان اول دفعه هتتخرج السنادي لسة ومحدش يعرف مصيرهم اي او هيشتغلوا كلهم ولا الاوائل بس لسه محدش يعرف
بالنسبة للدراسة بقا 4 سنين
والدراسة كلها بالانجليزي
عملي ونظري
مصاريف الكلية بقا
سنة اولي وتانية، 10آلاف
سنة تالته ورابعة. 12ألف
وممكن يزيدوا السنادي الله اعلم
فيه بقا قرار ممكن اغلبكم ميعرفهوش او ممكن في ناس متكلمتش عنه في الجروب
بيقولك يباشا انت عشان تطلع سنة تالته لازم ولابد وحتما تجيب في سنه اولي وسنة تانية 80% عشان تطلع سنة تالته
فولنا ماشي ممكن نشد في المذاكرة ونجيبوا المجموع دا قالك لا برضوا
انت حتا لو جبت المجموع دا مش هتطلع سنه تالته طب لي يعم
قالوا احنا عاوزين اعلي 100 طالب بس هما الي يطلعوا سنه تالته
يعني لو فيه 500 طالب جايبين المجموع المطلوب هياخدوا منهم اعلي 100 طالب ويطلعوا سنة تالته
وطبعا دا قرار صادم جدا لان انت لو قبلت ودخلت هتبقي في حرب فعلا وتحدي كبير
طب السؤال بقا الناس الي مش هتطلع سنة تالته دي مصيرها اي ممكن تكمل في كلية هندسة بقا اوتعليم صناعي او او
قالوا لا برضوا
اومال مصيرهم اي
هياخدوا شهادة دبلوم تكنولوجي فوق متوسط ولا يسمح لك باكتمال تعليمك في اي من كلية او معهد سواء حكومي او خاص
والي كمل تالته ورابعه
هياخد شهادة بكاليريوس تكنولوجي في التخصص الي درسه.


ثانيا بقا لو مجموعك من 80 ل 85
وعاوز حاجه خاص
انت هنا بقا يباشا عندك افضل حاجه في المعاهد الخاصة الا وهي المعهد العالي للهندسة والتكنولوجيا
دراسته اي وشهادتة اي والاهم مصاريف كام
اولا دراسته 5 سنين


بتدرس اولي اسمها اولي اعدادي ومجموعك في اولي بيدخلك قسم من الي موجودين في المعهد
شهاتة اي
بتتخرج معاك بكاليريوس هندسة في القسم الي درستة زيك زي خريج كلية هندسة الفرق انه درس في جامعه حكومي ونتا في خاصة
الاهم بقا مصاريفه كام
بتختلف علي حسب كل معهد وافضليته واقسامه يعني مثلا معهد العاشر من رمضان مصاريفه 25ألف او اكتر
معهد البحيرة مصاريفه حوالي 12 او اكتر
فانت علي حسب المعهد واقسامه بيتحدد المصاريف
وهنا اكون خلصت ويارب تكونوا اسدفتم حاجه وممكن اكون نسيت معهد او كلية او غلط في حاجه فا قولولي في الكومنتات

ونصيحتي ليكم
فكروا صح في كل خطوه هتخدوها فكروا صح عشان متندموش بعدين فكر مع اهلك وصحابك الي مكملين معاكم فكر صح عشان انت خلاص علي اول طريقك لمستقبلك وبناء نفسك ومن بعدها هتبني اسرتك فكر صح عشان اي غلطه هضيع سنه من عمرك لو فكرت تدخل معهد او كلية مش حاببها او دخلتها عشان ضغوطات اهلك او عشان هي قريبة او عشان صحابك معاك وبعدين اكتشفت ان دا مش مكانك وانك تستاهل مكان تاني ودراسة تانية وتخصص تاني فكر صح عشان الوقت بيقرب وفجأه هتلاقي الرغبات وبعديها التنسيق. طبعا هتسمع كلامي وتقول عليا دا مهندس ولا مدرس لا انا طالب زيكم في سنة اولي معهد فني صناعي وخلاص داخل تانية اهو وبكلمكم في حاجه انا عايشها وحكيت عن كلية هي حلمي وحلم ناس كتير عازين يدخلوها فا فكر صح عشان تبقي قدوة وتفتخر بنفسك وتفرح ابوك وامك باي انجاز هتعمله وربنا يوفقنا جميعا،
author-img
بدر جمال

تعليقات

google-playkhamsatmostaqltradent